Die Jugend woa scho imma schlecht
Früher hätts des net gebn
früher hamma gfoigt
Des ganze hinterfragen
hätt früher kana gwoit
I waß nu wie i jung woa
do hamma des net ghobt
Die Jugend woa normal
und stoiz auf Gott und Statt
Du i siag schwoaz
die jungen Leit
san verwöhnt und nix Gscheids gfreits
Jojo es stimmt
I gib da Recht
Die Jugend woa scho imma schlecht
Es war jo net so schwer
zwa Joa zum Militär
do wean die Wadln viregricht
und gessn war die Gschicht
es war jo eh ganz leicht
a Fetzn, am Bestn feicht
bei uns woas sicha a net verkehrt
dann hamma hoit moi great
Du i siag schwoaz
die jungen Leit
san verwöhnt und nix Gscheids gfreits
Jojo es stimmt
I gib da Recht
Die Jugend woa scho imma schlecht
Dann woins auf amoi wer anders sei
und akzeptiern net die Natur
A Mädl bleibt a Mädl
A Bua bleibt a Bua
Dann woins auf amoi was bsonders sei
Und schwänzen d’Schui für a bissl schrein
Vielleicht is wieda Zeit für mehr Härte do
Und die Blümchenpädagogik vorbei
Die Jugend wü nix hackln
und hat kane Maniern
Sie picken si auf d’Stroßn
und nennans demonstriern
Du i siag schwoaz
die jungen Leit
san verwöhnt und nix Gscheids gfreits
Jojo es stimmt
I gib da Recht
Die Jugend woa scho imma schlecht
Fehleranfällig
Wir ham probiert die Weisheit fressn
Mit löchrigen Suppenlöffeln
Warum soi ma leicht wissen
Vo wo ma hergschwumma san
Mit Schwimmflügerl dran
Wir san von Fehlern aus denen ma lernt
Ganz weit entfernt
Wir hams probiert zum inhaliern
Aber die Filter woan aus Sta
Drum samma deppat bliebn
Owa wuzeln die andre nach der an
Und vom ganzen Drahn
Samma von Fehlern aus denen ma lernt
Ganz weit entfernt
Mit letzter Konsequenz
Lernresistent
Aus hundert einstellig
Fehleranfällig
Wir hättn gnuag Fehler gmacht
Da Gatsch is ausgriffn
Wir warn oft gnuag in d’Wand kracht
Ham gnuag Sterndl grissn
Und was hats uns bracht
Wir san von Fehlern aus denen ma lernt
Ganz weit entfernt
Mit letzter Konsequenz
Lernresistent
Aus hundert einstellig
Fehleranfällig
10 Minuten zweng
Von seim Kalender übern Schreibtisch der da nebn dem Fetzn hängt
Auf dem liebevoll mit Kreuzstich eigstickt steht wer an eam denkt
Zitiert er jeden morgen des Sprücherl vom Tag
Motivierend, animierend würd er sagn wann ma eam fragt
Ois kann optimiert werdn ois gheat durchorganisiert
Die Prozesse san die Schlüssel und ois gheat zentralisiert
Arbeitst gscheid und effektiver is für mehr Arbeit mehr Zeit
Nur wannst umfoist kannst du aufsteh und dann is fliagn nimma weit
Wieda 10 Minuten eingspoat
A Stockerlplatz beim Volkssport
Schau, dass olle seng
Wieder 10 Minuten aufghoit
Eineghackelt auszoit
10 Minuten zweng
Es gibt kann schlechten Tag nur schlechte Arbeitsmoral
Und jeder Schaden is so sag ma afoch kollateral
Die Grenzen, die du glaubst zum kenna san nur in deim Kopf
Mach deine Schwächen deine Stärken nimm jede Chance beim Schopf
Die Zeit die lasst si finden ois gehat durchoptimiert
Zeit is relativ, Zeit gheat moderner definiert
Hoachts auf sein Kalender, hoachts auf eam wann er zitiert
10 Minuten mehr san 10 Minuten, die ma gspiat
Wieda 10 Minuten eingspoat
A Stockerlplatz beim Volkssport
Schau, dass olle seng
Wieder 10 Minuten aufghoit
Eineghackelt auszoit
10 Minuten zweng
Hoacht si guat an, wird scho stimma
Hoacht si guat an, schrei mas nach
10 Minuten einebringa
Hat genau 10 Minuten zweng bracht
Hoacht si guat an, wird scho stimma
Hoacht si guat a, schrei mas nach
Zeit is Goid und Goid für imma
Imma samma 10 Minuten z’spot
Wieda 10 Minuten eingspoat
A Stockerlplatz beim Volkssport
Schau, dass olle seng
Wieder 10 Minuten aufghoit
Eineghackelt auszoit
10 Minuten zweng
Federleicht
Kurz bevors zvü wird
Bevor die Luft ausgeht
Kurz bevor ma ausgliaht
Und ma grod nu steht
Die Fiaß schwa mit Sta in den Schuach
A Wöd alla und kana der an suacht
Und kurz bevors zvü is und kurz bevors reicht
Wird’s federleicht
Kurz bevors s’Wasser
übern Hois steigt
Bevor ma ois Nasser
im Dreck liegen bleibt
A Rucksack sauschwa voi Stana am Ruckn
Ziagt owe und kurz vorm zadruckn
Kurz vorm End und kurz bevors reicht
Wird’s federleicht
Finster
Abend is koit wird’s zum Glück bini drin
Und finster sois net z’lang sei
Draußen ans Fenster stö i a Kerzel in Wind
Wann i draufschau is hell red i ma ein
I knia aufn Boden und bet zu Sonn
Dass die Händ vom Falten Blasen kriagn
Und da Wind, da Wind, des Teufelskind
Duat des Kerzerl sekkiern
Und es is imma, imma nu finster
Draußen am Fenster brennts s’Kerzerl schwach
Es is imma, imma nu finster
S’Kerzerl am Fenster kämpft gegen d’Nacht
I woat, was erwarten sie alle so schnell
Mit dem was i hab mach i vü
Wars s’Kerzerl größer wars a mehr hell
Und die Nacht macht hoit was sie wü
Und es is imma, imma nu finster
Draußen am Fenster brennts s’Kerzerl schwach
Es is imma, imma nu finster
S’Kerzerl am Fenster kämpft gegen d’Nacht
Und es is imma, imma nu finster
Draußen am Fenster brennts s’Kerzerl schwach
Es is imma, imma nu finster
S’Kerzerl am Fenster kämpft gegen d’Nacht
Und es is imma, imma nu finster
Drinnen im Zimmer brennt sonst ka Licht
Es is imma, imma nu finster
Am Fenster brennts s’Kerzerl fois i mi fiacht
I siag wos
Geh an großen Schritt zruck und
setz den Fleckaln die Gleitsichtbrülln auf
deine Augen san pumperlgsund
machs hoit auf und schau
Du varennst di beim umdrahn
Und verlierst di mit Augenbinden drauf
Dir ist schwindlig und schlecht in am
Und die Sunn geht nie auf
Schau nu moi genauer hin
Schau nu amoi richtig
I siag wos, wos du net siagst
Und des is offensichtlich
I siag wos wos du net siagst
Des is glitzernd und kunterbunt
Do san Woikn wosd drüberfliagst
Und do is die Sunn
Schau nu moi genauer hin
Schau nu amoi richtig
I siag wos, wos du net siagst
Und des is offensichtlich
Feiastö
Du siagst a Investment
Profite vü und schnö
I siag a Feiastö
Du siagst di hundert Hundada
Du siagst a Wirtschaftswunder
I siag Zunder
Du siagst Gewinn i siag Benzin
Schau wie’s brennt lass sie brenna
Mit jedem Cent wird’s schena
Hoch und hell
So sche brennts lass sie brenna
Jeder Cent machts schena
Die Feiastö
Du siagst die Wöd voi Göd
Du siagst jeden Cent
I siag wie’s brennt
Du siagst Gewinn i Kerosin
Schau wie’s brennt lass sie brenna
Mit jedem Cent wird’s schena
Hoch und hell
So sche brennts lass sie brenna
Jeder Cent machts schena
Die Feiastö
Zogn und gschobn
Selbstverständlich selbstbewusst
Gschrian is gwusst
Pausenlos Punkt um Punkt
A Kindergeburtstag und da Zucker kommt
Do wird zogn und gschobn und gspuckt
Do wird umadumdruckt
Do wird giftlt und glogn
Und ka Wimper zuckt
Zucker a Notwendigkeit
Schlaf a Fantasie
A einmalige Gelegenheit
Do wüst dabei sei, so muaßt hi
Do wird zogn und gschobn und gspuckt
Do wird umadumdruckt
Do wird giftlt und glogn
Und ka Wimper zuckt
Hoitn
A poa wean durch Rost durchifoin
Lass es wöche sei de uns net gfoin
Fia olle wird’s net ois gebn
Es werdn net olle überlebn
A poa Eier werdn ausm Nest aussefoin
Lass es welche sei, die uns net gfoin
A poa Eier werdn am Boden verderbn
A poa Vögel werdn sterbn
Na leida, net olle, kinna ma hoitn
Hoit ma die, die uns gfoin
A poa wean ins Wasser einefoin
Lass es welche sei, die uns net gfoin
A poa weans net durchsteh
a poa wean untageh
Na leida, net olle, kinna ma hoitn
Hoit ma die, die uns gfoin